SCINDENDI Comas

SCINDENDI Comas

in luctu, ritus, occurrit apud Statium Theb. l. 11. v. 317.

At genitrix primam funestae fortis ut amens

Expavit famam (nec tarde credidit) ibat

Scissa comas ----

Vide supra, ubi de Capillis etc. Item Vestes, apud antiquos frequens admodum, tum in Sacris Literis, tum apud omne genus aliorum Auctorum occurrit. Vide de Persis Herodotum l. 1. de Armenis Xenophontem Cyripaed. l. 3. de Romanis, Herodianum l. 1. ubi de sorore Commodi, Silium l. 13. ubi de Scipione, et l. 16. ubi de Peloro, Alios. Unde et apud Virg. l. 12. Aen. v. 609.

------ it scissa veste Latinus.

De Aegyptiis, Musaeum, ubi de praecipitante se Herô; de Lucensibus, Agathiam l. 1. etc. Inprimis Iudaeos morem habuisse, auditô blasphemô Israelitâ vestem scindere, notat in Praetermissorum libris Io.

Drusius. Et quidem de aliis causam assignat Sedulius l. 4. de Miraculis in morte Christi:

------ ritu plangentis alumni

Saucia discissô nudavit pectora velô.

Nimirum ut vulnerata pectora conspicerentur: vel saltem, ut ea nuda apparerent, quod itidem in luctu factitatum. Statius d. l. de cadem matre,

------ et pectore nuda cruento.

Sed exteriorem solum tunicam Iudaeos scindere in more habuisse, observat Victor Antiochenus Commentar. in Marcum c. 4. Quam in rem vide plura apud Casp. Barthium Animadv. ad Papinium Statium passim, inprimis ad locum supra cit. Ut et supra, ubi de Luctu, lacerandique vestes et Lugendi ritibus. Et quidem maestitiae hae signa: uti Scissura unguium, inter levioris poenae mediô aevô genera fuit, ut videbimus infra voce Unguis. At scissio coronarum, quam ςτεφάνων σπάραγμα vocat Plut. περὶ ἀοργ. libidinis et intemperantiae certissimum indicium fuit, de quo multa Car. Paschalius Coron. l. 2. c. 7. Unde Horatius linvitans Tyndariden in agrum Sabinum, ad convivium modestum ac pudicum, ait Carm. l. 1. Od. 17. v. 24.

------ nec metues protervum

Suspecta Cyrum, ne male dispari

Incontinenteis iniciat manus,

Et scindat haerentem coronam

Crinibus etc.

Vide supra Florea corona. De ratione cibos ingeniose scindendi, vide quoque infra in voce Scissor; uti de Scissis ruptisque olim pecoribus in Bacchicis sacris, supra voce Pecora; de scissa mundorum quadrupedum in Vet. T. ungula, infra Ungula.